到了我這把年紀，身邊姐妹們的話題，難免由少女時代的初戀拍拖扮靚，轉變到婚姻婆媳孩子姑嫂。一個又一個朋友為不相同又差唔多的事情煩惱。
朋友A小姐為結婚計畫而煩，為麻煩奶奶而惱。另一個B小姐勇敢地奉子承婚，煩如何速戰速決定下來，然後見步行步，見招拆招。
今天這一個C小姐，和男友兩人初戀就一拍即合，一年多後浪漫男友主動要求結婚。C小姐知道找對人了，不過覺得快左少少，但男友好憧憬結婚的浪漫，並計畫婚後搬入男友居所。原本一切幸福美滿，但由於空間少雜物多，男友又捨不得心愛舊物，更需要與奶奶妯娌同住，她又對這些關係及居所有點潔癖。只是想像都煩到爆!
每個好熟既朋友要結婚都會問問他們，決定結婚前有無諗清楚?
咩叫諗清楚呢? 好空泛。
你知道婚姻是一個怎麼的概念嗎? 是兩個家庭的結合，不是童話小說的兩個人有愛就會幸福那種。特別是與家人同住，暫未能二人世界。
心理上有沒有準備好?
咩叫準備好?又係好抽像。
過去的生活需要有大轉變，有另一個完全唔同的人，帶住完全唔同的習慣同期待，要進入你的生活，人生進入新階段。
最好當然一起建立一個新的屬於倆人的愛巢。
但香港地寸金尺土，如經濟不許可，要與男方家人同住(多數男方喇)。除非住千尺豪宅，否則男女雙方均要作出捨棄或付出。
要丟晒以前珍藏版CD/玩具/漫畫/靚衫/靚鞋/手袋/明星畫報/波鞋/模型......甚或是童年時的記念冊/獎杯等。
唔捨得? 仲細路世咩，玩模形?一係租個迷你倉，得閒先去回味下。唔係咁邊夠位放多個人入黎住，屋企幾錢尺呀?
又要俾錢油下間房，買過個衣櫃大床，以前黑白灰個個仲用得? 但邊夠放兩個人既衫呢?
我夠唔鍾意花碌碌床單喇!
日後清潔整理，洗衫抺地，邊個俾錢，邊個者飯洗衫，諗好未?
「喂，大家有野做，又係到住，你諗住俾奶奶幾錢家用?」
「大嫂都無俾喇?」
「咁點同， 人地還人地，人地賺得又唔多。」
「老公，你又諗住俾幾多我呀媽?我嫁左日成都陪唔到我呀媽，佢有高血壓架。」
「俾幾多先夠呢?」
「......」
「不如唔好煩，各自供養番自己父母，好無?」
「但住係呢到，燈油火納，俾多少少都要既。」
「......」
未完架，你的潔癖佢的污WET，都要妥協。仲有早上點爭廁所用，第時生仔呀，大嫂姑仔呀個D。上世紀奶奶一入門就要做晒成家既家務，一直做到新抱入門先可以甩身。而家你有份工就話唔做? 當初傾禮金個陣咩價位呀?
奶奶無過出聲架，但個心點諗呢，就以後先知喇。
「唉，煩完未呀?」
「 ......仲有下半世你煩喎。」
「諗諗下，其實都係做人個女最幸福。呀媽呀爸鍚晒，得閒又可以撒下嬌。」
「咁你又咁憧憬結婚? 」
「......結婚都唔係想像中個回事既?」
「你夜晚臨瞓前係咪仲睇緊白雪公主?」
「唔，咁有睇韓劇既，我死都唔嫁去韓國架! 況且，人始終要長大既，唔可以做一世細路仔。」
「咁就識諗喇，咁你準備好味呀?」
「嗚......我唔想準備好囉。」
沒有留言:
張貼留言